Concentración: Bendición de les agües 2009 (29 de Xunu)

¡Como si nun tuviéremos na Asturies moderna y contemporánea persones y acontecimientos abondos que fueron modelos de vida, d'heroismu y d'entrega, que marquen un fitu abondo grande pa celebralos como se merecen!

Un añu más, esta honrada y emprendedora villa de Xixón por decisión del so ilustre Ayuntamientu vien obligada a cellebrar la so fiesta'l día d'un tal Simón fíu de Jonás que se supón nació va más de dos mil años en Galilea y al que los cristianos llamen y cellebren como san Pedru.

El tal Simón, o Pedru, o Pedrín el del mantu, nin tuvo enxamás n'Asturies nin mucho menos en Xixón. De xuru nin siqueira conociere la esistencia de los Astures y mui probablemente, de tener sabío d'ellos, nun-y daríen más.

Pues bien. Magar too, les nuestres ilustres autoridaes municipales anecien añu tres añu n'honralu y festexalu y a qu'ésta seya la fiesta ofical de la nuestra ciudá.

Yá sabéis por qué. Porque diz la ilesia católica, que continúa con mandu en plaza, que foi'l so primer xefe. A cellebralo y a obedecer.

Y non solo eso. La Excelentísima Señora Doña Paz Fernández Felgueroso, alcaldesa ilustre de la ciudá, que se proclama socialista y fidelísima cumplidora de la Constitución, acurrirá primero a misa y depués al actu llitúrxicu católicu de la bendición de les agües del tormentosu Cantábricu. Fairálo como alcaldesa, en representación de tola ciudadanía y arrodiándose de los más altos cabezaleros eclesiásticos. Toos xuntos, complacíos, alegres y satifechos amosarán ante tola ciudadanía que-yos importa pocu aquello de la separtación de la ilesia y l'Estáu.

Pues bien, señoríes de los tres grupos municipales, Excelentísima y Reverendisima Señora: la separtación de la ilesia y l'Estáu, la llibertá de concenxa non a toos nos da lo mesmo.

La Plataforma Laica d'Asturies convócavos a toos y toes a acurrir y manifestar cola nuestra presencia de forma pacífica, respetuosa y ensin armes que nun tamos d'alcuerdu nin colo que fai l'Alcaldesa nin l'Ayuntamientu y que toos estos fastos clericles nun faen sinón emporcar y humillar l'autoridá del Estáu y poner n'evidencia la hipocresía de los nuestros gobernantes.

¡POLA SEPARTACIÓN DE LA ilesia Y L'ESTÁU!

CONCENTRACIÓN EL DIA 29 A LES 12,30 NOS XARDINOS XUNTO A LA ilesia de san pedru

¡NON A LA PRESENCIA D'AUTORIDAES NOS ACTOS RELIXOSOS!