TRIBUNA PAOLO FLORES D'ARCAIS: A La So Eminencia'l cardenal Rouco Varela

Paolo Flores d'Arcais 18/10/2008

El cardenal Antonio María Rouco Varela, presidente de la Conferencia Episcopal Española, nes sos pallabres énte'l Sínodu Mundial de los Obiespos, volvió acusar al laicismu de querer facer realidá "la dictadura del relativismu éticu". L'aspeutu más grave d'esta verdadera dictadura laicista sedría, en pallabres suyes, el "tratamientu llegal dáu al drechu a la vida, como si l'Estáu pudiera disponer illimitadamente d'él"

¿Cómo un "Dios del amor" pue obligar a los enfermos terminales a sufrir meses de tortures?

Evidentemente, a La So Eminencia escápase-y que namás puese falar de dictadura cuando a los ciudadanos se-yos obliga a aceutar, contra la so voluntá, les decisiones d'un poder autoritariu. Por exemplu, si un Estáu obligase a toles muyeres, independientemente de la so voluntá, a albortar siempre que yá tengan un fíu, sedría (inclusu si tuviera xustificao por motivos gravísimos d'esplosión demográfico) un casu de dictadura, anque l'Estáu en cuestión fora democráticu. Agora bien, el famosu relativismu laicista nun quier enxamás obligar a naide. A lo contrario, nos llugares nos qu'hasta agora llogró prevalecer, esi relativismu - que ye lo mesmo que'l calter pluralista d'una sociedá abierta- permitió que cada muyer escueya con llibertá si quier llevar a cabu'l so embarazu o non, lo que ye too contrario d'una obligación impuesta y sancionada pol Estáu.

El drechu del Estáu "a disponer illimitadamente de la vida" faise realidá, en tou casu, notres ocasiones: na guerra, cuando hai serviciu militar obligatorio, na pena muerte o, peor entá, na llegalización de la tortura a presos. Pero La So Eminencia Rouco Varela sabe perfeutamente que la Ilesia Católica nun condergó hasta hai bien pocos años, y con una formulación ambigua, la pena de muerte (que tuvo vixente na Ciudá del Vaticanu hasta 1969) y tamién sabe que la introducción del drechu a la oxeción de concenxa pa nun facer el serviciu militar ye, precisamente, una de les grandes batalles laiques nes que la Ilesia Católica NUN tien participao.

L'amenaza totalitaria faise realidá namás que cuando una institutción quier decidir en cuentes del ciudadá cómo debe ser la sovida. Porque, ¿quién pue disponer sobre la vida sacantes del que la vive? Ente dos seres humanos, tu y yo, ¿qué aberración xustifica que yo puea decidir sobre la to vida? Y lo de menos ye qu'esi yo que pretende decidir de forma totalitaria la to vida seya un individuu, seya l'Estáu o seya la Ilesia.

Teo enfotu en que La So Eminencia el cardenal Antonio María Rouco Varela nun respuenda que'l que dispón sobre la mio vida, como de la vida de cualquiera, nun ye quien la vive sinón Dios. Porque Dios nun fala, sinon que son siempre los seres humanos los que falen nel so nome (cosa que, aparte de tou, ye una forma de deliriu d'omnipotencia).

En segundu llugar, porque Dios esiste pa unos pero non pa otros y toos son ciudadanos, polo que Dios, nuna democracia, nun pue convertise n'argumentu, yá qu'ello discriminaría manifiestamente a los non creyentes.

En tercer llugar, porque caún tien el so propiu Dios, qu'impón distintos drechos y obligaciones (el dios xudíu ufre'l drechu al divorciu, el dios cristianu ordena'l matrimoniu indisoluble, el dios islámicu da drechu a tener cuatro muyeres... Y sobre asuntos como l'albuertu y la eutanasia, cauna de les ilesies tien un puntu vista diferente).

Y, pa cabu, porque la vida ye un regalu, y un regalu pue ser refugáu; sinón, llámase condena.

En resume, el drechu de caún a decidir sobre la so propia vida (hasta la eutanasia) ye un drechu primordial ya inalienable que constitúi la base de tolo demás.

La So Eminencia ta a favor d'"un diálogu sinceru ente fe y razón" que "faiga presente na vida pública la verdá de Dios Creador y Redentos del home: del Dios que ye amor". Pero esta verdá de fe nun pue sre una verdá de razón, porque, siendo asina, cada atéu sedría un minus habens dende'l puntu de vista psíquicu.

El diálogu sinceru, poro, implica que la Ilesia del cardenal Antonio María Rouco Varela renuncie a forciar a quien nun ye creyente a aceutar decisiones sobre la so vida, el so nacimientu y la so muerte, al traviés de la violencia que representa una imposición d'Estáu, que ye delo que trata de facer la Ilesia católica n'España y n'Italia, en Polonia y n'Irlanda, y en cualquier llugar en que se siente fuerte abondo.

Lo irónico ye que se fale d'un "Dios que ye amor" pa obligar a los condenaos a muerte por una enfermedá terminal a sufrir hores, díes, selmanes ya incluso meses una tortura a la que la so llibertá desearía poner fin. Ye un amor verdaderamente estrañu ésti que se atribúi a Dios.

Si nun fora porque, al atribuir a Dios una crueldá semeyante, amuesen ser los heriedes - claramente non arrepintíos- non de Francisco de Asís, sinón del inquisidor Torquemada.

Paolo Flores d'Arcais, filósofu, periodista y editor italianu, ye director de la revista MicroMega. Ente les sos obres espublizaes n'español destaca El soberano y El disidente. Traducción de María Luisa Rodríguez Tapia al castellanu.

Fonte de la imaxe: Uiquipedia