Manifiestu de la Plataforma Laica d'Asturies

MANIFIESTU DE LA PLATAFORMA LAICA D'ASTURIES

Les organizaciones que firmen abaxo, considerando:

• Que la llibertá de concenxa ye ún de los entamos básicos de la democracia y ún de los drechos civiles de la persona

• Que tou estáu tien la obligación de respetar esti drechu d'acordies colo que s'establez nel artículu 18 de la Declaracion de los Drechos Humanos de les Naciones Xuníes

• Que toa persona tien drechu a la llibertá de pensamientu, de concenxa y de relixón, y qu'esti drechu inclúi la llibertá de tener una relixón o cualesquier convicción de la so eleición, asina como la llibertá de manifestar la so relixón o les sos convicciones individual o coleutivamente, tanto en público como en privao, por aciu del cultu, la observación, la práutica y l'enseñu.

• Que l'exerciu d'estos drechos nun pue, baxo denguna forma, exercese utilizando les instituciones del Estáu

• Que les confesiones y organizaciones relixoses son entidaes de calter priváu

• Que la llibertá de concenxa desixe la separtación de la Ilesia y l'Estáu, ensin que denguna relixón o credu goce de privilexu dalu.

• Que'l preséu básicu p'algamar una sociedá llaica n'Asturies ye la escuela pública, universal, llaia y financiada dafechamente pol Estáu. Esa escuela deberá respetar y promover el pluralismu ideolóxicu y la llibertá de concenxa, la defensa de la cual debe ser ún de los oxetivos fundamentales.

• Que dende que s'aprobara la Constitución Española y l'Estatutu d'Autonomía d'Asturies, nengunu de los respectivos gobiernos non sólo nun dieron cumplimientu y satisfacción a estos drechos civiles, sinón que llexisló en dambes estayes cada vegada mayores privilexos pa la ilesia católica ya hipotecando la nuesa soberanía al estáu vaticanu.

• Que ye necesario acabar con esta situación y, poro, entamar na sociedá asturiana un llabor de concenciación de la ciudadanía pa que desixa a los sos gobernantes el respetu plenu y el cumplimientu de los drechos civiles y democráticos.

Nós, les organizaciones abaxo firmantes, xunto a munchos ciudadanos y ciudadanes llibres, independientes y defensores del llaicismu, somos la Plataforma Laica d'Asturies, que trabaya pola consecución de la Llibertá de Concenxa y nagua por un Estáu Llaicu. Asina mesmo, invitamos a participar nello a toles persones que honesta y honradamente deseen xunise a estos ideales xustos, cívicos y democráticos.

Por too ello, DESIXIMOS:

• La derogación de los actuales alcuerdos ente la Ilesia Católica y l'Estáu Español de 1976 y 1979, ensin necesidá de que seyan sustituyíos por dengún otru.

• El cese de la financiación estatal a cualquier institución relixosa.

• La eliminación de l'asignatura de relixón como enseñu curricular.

• Que nengún cargu públicu se sume a manifestaciones relixoses nel exerciciu de les sos funciones.

• Desaniciar cualquier tipu d'adoctrinamientu relixosu de la infancia nel ámbitu escolar.

• La declaración de llaicismu nel Estatutu d'Autonomía d'Asturies

• La declaración espresa nesi Estatutu que garantice que l'enseñu públicu n'Asturies ye llaicu.

Firmen el manifiestu: Izquierda Republicana de Asturias, Europa Laica, SUATEA, XEGA (Xente Gai Astur), Sestaferia, Partido Comunista de Asturias, Federación de Padres y Madres de Alumnos de Asturias, Logia Masónica Rosario Acuña (Gran Oriente de Francia), CSI y CC.OO.