Comunicáu énte la cellebración del prósimu 8 de Setiembre

El prósimu día 8 de Setiembre cellébrase'l Día d'Asturies y ente los actos del executivu asturianu y autoridaes civiles y militares en xeneral ta l'asistencia a los oficios relixosos que se faen en Cuadonga. Esisten afartos motivos culturales pa considerar inapropiada la cellebración del Día d'Asturies nuna fecha que conmemora la victoria del cristianismu sobre l'Islam, xeneradora d'un estáu feudal que durante sieglos oprimió al pueblu asturianu a la servidume y privilexos de la nobleza y cleru. Sicasí, dende la Plataforma queremos centrar la nuesa atención non tantu no inapropiao de la fecha y efeméride escoyida pa cellebración tala, sinón na participación, nel exerciciu de les sos funciones, de les nueses autoridaes nos oficios relixosos.

Ún de los principales pegoyos de toa democracia ye'l respetu a la llibertá de concenxa. Poro, la Constitución establez y obliga a cumplir l'aconfesionalidá del Estáu.

Consideramos que la reiterada y ostentosa participación nestos actos, que les autoridaes autonómiques ,encabezaes pol so presidente, tienen convertío nun ceremonial indispensable na cellebración del Día d'Asturies, non sólo vulnera la Constitución, sinón qu'atenta escontra la llibertá de concenxa de los ciudadanos y ciudadanes d'Asturies.

La ilesia católica, les sos creyencies y los sos rituales pertenecen al ámbitu priváu de cada persona, pero les autoridaes autonómiques anecien añu tres añu en reconocer a la xerarquía eclesiástica'l calter d'autoridá pública, acurriendo a les sos ceremonies y ritos, como si formaran parte de les propies instituciones d'Asturies. Faciendo casu omisu de la Constitución y d'otres lleis, impónennos esta concepción antidemocrática a tola ciudadanía.

Plataforma Laica d'Asturies, 6 de Setiembre de 2008