Comunicáu ante'l Congresu del PSOE

Nel Congresu del PSOE aldericóse d'una ponencia sobre llaicismu que nun supón dengún avance nesti terrén.

Pa la Plataforma Laica d'Asturies, ocurrió nada más y nada menos que lo yá esperao y que nos afita nes nuestres posiciones.

La separtación ilesia-Estáu nunca sedrá aceptada nin promovida polos partíos políticos que montaron el sistema llamáu de la transición.

La xunión de la ilesia y l'Estáu, espresada nos alcuerdos col Vaticanu, ye una pieza fundamental del sistema políticu vixente n'España y de profundidá tala que si se desaniciara, al ser ún de los sos pegoyos, podría cayer el propiu sistema.

Poro, l'avance del llaicismu solo sedrá posible per aciu de la so estensión na concenciación público y na creación d'un fuerte movimientu ciudadanu. Y ye nesti sentíu nel que valoramos mui positivamente que güei puea dicise que práuticamente en tol territoriu del Estáu español esistan organizaciones como la Plataforma Laica d'Asturies.

Foi la opinión pública la que obligó al PSOE a tener que tratar el llaicismu nel so congresu, magar que la direición nun quedría nin falar del asuntu porque ante la ciudadanía aparecerían les sos posiciones inmovilistes, como asina asocedió.

En cuantu a Asturies, consideramos que nenguna de les tres fuercies polítiques que formen el Parllamentu nin defienden la separtación de la ilesia y l'Estáu nin la defenderán. El Partíu Popular dizlo nidio y abierto; el PSOE, como acabamos ver, nun va dar nin siquier un pasu nesa dirección y n'Asturies la Conseyería d'Educación nun ye quien a situar l'asignatura de relixón católica del Bachilleratu fuera del horariu escolar, como acaben facer en País Vascu, y anque IX de xemes en cuando diga que ta pola derogación de los alcuerdos col Vaticanu, son declaraciones non creíbles pues baste recordar que dieron el sí a la Llei Orgánica d'Educación que propunxo'l PSOE, llei qu'enanchó la enseñanza concertao, na so mayoría de congregaciones relixoses, a tolos niveles y caltuvo la enseñanza de la relixón católica como asignatura en primaria, secundaria y bachilleratu. Per otra parte, amás de ser partidarios de la enseñanza concertao, tanto nel Parllamentu rexonal como en dellos conceyos dieron el so votu a favor de subvenciones al obispáu con dineru públicu.